2Ch 20 | NdeIBE | STEP | Ngemva kwalokho amaMowabi lama-Amoni kanye labanye bamaMewuni baphuma impi ukuba bayehlasela uJehoshafathi.

2 Chronicles 20

UJehoshafathi Unqoba AmaMowabi Lama-Amoni

1 Ngemva kwalokho amaMowabi lama-Amoni kanye labanye bamaMewuni baphuma impi ukuba bayehlasela uJehoshafathi.

2 Amanye amadoda aya kuJehoshafathi afika athi kuye, “Kulempi enkulu ezayo ukuzakuhlasela evela ngase-Edomi, ngaphetsheya kolwandle. IsiseHazazoni Thamari” (okuyikuthi, Eni Gedi).

3 Ngokwethuka, uJehoshafathi wazimisela ukumdinga uJehova uNkulunkulu, wamemezela ukuba akuzilwe ukudla kulo lonke elakoJuda.

4 Abantu bakoJuda baqoqana bahlangana bezodinga uJehova, lakanye baphuma kuyo yonke imizi yakoJuda.

5 Ngakho uJehoshafathi wema phambi kwebandla lakoJuda lelaseJerusalema ethempelini likaJehova phambi kweguma elitsha 6 wathi, “O Jehova, Nkulunkulu wabokhokho, kakusuwe yini uNkulunkulu osezulwini? Ubusa phezu kwemibuso yezizwe zonke. Amandla asesandleni sakho, njalo kakho ongamelana lawe. 7 O Nkulunkulu wethu, awubaxotshanga ababekuleli lizwe phambi kwabantu bakho bako-Israyeli wabanika ukuba libe ngelabo nini lanini abesizukulwane sika-Abhrahama umngane wakho na? 8 Sebehlale kulo njalo sebakhe indawo yokukhonzela yeBizo lakho, besithi, 9 “Nxa sisehlelwa zinhlupheko, loba yinkemba yokwehlulela, loba yizifo loba yindlala, sizakuma ngobukhona bakho phambi kwalelithempeli elileBizo lakho sikhale kuwe ekuhlukuluzweni kwethu, wena uzasizwa njalo usisindise.’

10 “Kodwa khathesi nanka amadoda ama-Amoni lamaMowabi labe-Ntabeni yaseSeyiri, abelizwe owalela u-Israyeli ukuba alinqobe ekuphumeni kwakhe eGibhithe; okwabangela ukuthi babatshiye abaze bababhubhisa. 11 Khangela ukuthi khathesi baphindisela ngokunganani ngokusemuka isipho owasipha sona ukuba sibe yilifa lethu. 12 O Nkulunkulu wethu, awuyikubehlulela na? Ngoba asilamandla okumelana lebutho elikhulu kangaka elisihlaselayo. Asikwazi esingakwenza, kodwa amehlo ethu aphezu kwakho.”

13 Wonke amadoda akoJuda, labomkawo labantwabawo lezinsane, bema lapho phambi kukaJehova.

14 UMoya kaJehova wehlela kuJehaziyeli indodana kaZekhariya, indodana kaBhenayiya, indodana kaJeyiyeli, indodana kaMathaniya, umLevi oyisizukulwane sika-Asafu, emi phambi kwebandla.

15 Wasesithi: “Lalela, wena Nkosi Jehoshafathi labo bonke abahlala koJuda labaseJerusalema! Nanku okutshiwo nguJehova kini: ‘Lingesabi njalo lingadediswa yibukhulu bebutho laleyompi. Ngoba ukulwa akusikwenu, kodwa ngokukaNkulunkulu. 16 Kusasa hambani liyejamelana labo. Bona bazakhwela ngokhalo lwaseZizi, lina lizabafumana ekucineni kodonga eNkangala yaseJeruweli. 17 Aliyikuyilwa limpi. Lunganini ezindaweni; lime ngesibindi lizabona ukukhulula kukaJehova azalenzela khona, O lina bakaJuda lani beJerusalema. Lingesabi, lingadangali. Phumani kusasa liyehlasela, uJehova uzakuba lani.’ ”

18 UJehoshafathi wakhothama ubuso buphansi kanti njalo bonke abakoJuda labaseJerusalema bawela phansi ngobuso bemkhonza uJehova. 19 Ngakho abanye abaLevi bamaKhohathi, lamaKhorahi bema bamdumisa uJehova, uNkulunkulu ka-Israyeli, ngelizwi eliphakemeyo okuphezulu.

20 Kwathi ekuseni kakhulu basuka baya eNkangala yaseThekhowa. Bathi besuka lapho, uJehoshafathi waphakama wathi, “Lalelani kimi, bantu bakoJuda lani baseJerusalema! Thembelani kuJehova uNkulunkulu wenu uzaliphathisa.” 21 Ngemva kokubuza abantu, uJehoshafathi wakhetha amadoda okuhlabelela uJehova lokumdumisa ngenxa yenkazimulo yobungcwele bakhe bekhokhele amabutho, besithi: “Mbongeni uJehova, ngoba uthando lwakhe lumi nininini.”

22 Bathi beqalisa ukuhlabelela njalo bedumisa, uJehova wabeka abantu bokucathamela abase-Amoni labase-Mowabi labaseNtabeni iSeyiri ababedinga ukuhlasela uJuda, behlulwa. 23 Amadoda ako-Amoni lawamaMowabi avukela amadoda ayevela eNtabeni yaseSeyiri ukuba bawabulale bawatshabalalise. Ngemva kokuba sebeqedile ukubulala abaseSeyiri, banceda ngokubulalana bodwa.

24 Amadoda akoJuda athe efika endaweni emalungana lenkangala bakhangela lapho okwakulebutho elikhulu khona babona ngezidumbu zelekene phansi, kungekho loyedwa owayebalekile. 25 Ngakho uJehoshafathi lamanye amadoda bahamba bayabutha impango, njalo phakathi kwayo bafumana izimpahla zokusebenzisa lezambatho lezinye njalo izimpahla eziligugu – ukwedlula lezo ababengazithwala. Impango yayinengi kwaze kwathatha izinsuku ezintathu beyithutha. 26 Ngosuku lwesine babuthana eSigodini saseBherakha, lapho abadumisela khona uJehova. Kungenxa yalokho yonale indawo yabizwa ngokuthi iSigodi saseBherakha kuze kube lamhla.

27 Ngakho wonke amadoda akoJuda lawaseJerusalema abuyela ngokuthokoza eJerusalema, bekhokhelwa nguJehoshafathi ngoba uJehova wayebenzele lokho okwakubajabulisile phezu kwezitha zabo.

28 Bangena eJerusalema baya ethempelini likaJehova betshaya imihubhe lemiqangala lamacilongo.

29 Ukwesaba uNkulunkulu kwehlela phezu kwayo yonke imibuso emazweni besizwa ngokulwa kukaJehova esilwa lezitha zika-Israyeli. 30 Lakanye umbuso kaJehoshafathi waba lokuthula, ngoba uNkulunkulu wakhe wayemnike ukuphumula nxa zonke.

Isiphetho Sombuso KaJehoshafathi

31 Ngakho uJehoshafathi wabusa koJuda. Waba yinkosi yakoJuda eleminyaka engamatshumi amathathu lanhlanu, wabusa eJerusalema okweminyaka engamatshumi amabili lanhlanu. Unina wayengu-Azubha indodakazi kaShilihi. 32 Wahamba ngezindlela zikayise u-Asa njalo kazange aphambuke kuzo; wenza ukulunga phambi kukaJehova. 33 Izindawo zokukhonzela kazisusanga njalo abantu babelokhu bengazimiselanga ngezinhliziyo zabo ngokupheleleyo kuNkulunkulu waboyise.

34 Ezinye izehlakalo ngombuso kaJehoshafathi kusukela ekuqaleni kusiya ekucineni, zilotshiwe embalini kaJehu, indodana kaHanani, yona elotshwe egwalweni lwamakhosi ako-Israyeli.

35 Ngokuqhubeka kwezikhathi, uJehoshafathi waba lesibopho asenza lo-Ahaziya inkosi yako-Israyeli, owayelecala lokwenza okubi.

36 Wavumelana laye ukuba bakhe imikhumbi yokuthwala izimpahla zokuthengiselana. Ngemva kokuba isiyakhiwe e-Eziyoni Gebheri,

37 u-Eliyezeri indodana kaDodavahu waseMaresha wakhuluma isiphrofetho esilahla uJehoshafathi, esithi, “Ngenxa yokuthi wenza isibopho lo-Ahaziya, uJehova uzadiliza lokho okwenzileyo.” Imikhumbi yabhidlika ayaze yenelisa ukungena olwandle isiyathengisa.